यस वर्षका मुख्य चाडपर्वहरु नजिकिँदै छन् । आगामी असोज १६ गते बिजयादशमी वा बडादशैं पर्व परेको छ भने कात्तिक ६ गते तिहार पर्व परेको छ । 

यसवर्ष पनि विभिन्न अटो कम्पनीहरुले आफ्नो सवारीप्रति ग्राहकलाई आकर्षण गर्ने हेतुले विभिन्न अफर तथा स्किमहरु ल्याइरहेका छन् ।

हुन त यसअघि काठमाडौंको भृकुटीमण्डप स्थित प्रदर्शनीस्थलमा सम्पन्न भएका नाइमा मोबिलिटी एक्स्पो र नाडा अटो शो २०२५ देखि नै विभिन्न अटो कम्पनीहरुले विभिन्न चाडपर्व लक्षित अफर समेत सार्वजनिक गरिसकेका छन् । अटो प्रदर्शनी अघिदेखि नै कतिपय अटो कम्पनीले आफ्नो सवारीको बिक्री बढाउन ग्राहकलाई विभिन्न स्किम र अफर दिने गरेका छन् ।

कतिपय अटो कम्पनीहरुले चाडपर्व लक्षित स्किमहरु ल्याउने क्रम बढिरहेको छ । नेपालमा चाडपर्वका बेला हुनेले नयाँ कपडा र गाडीहरु किन्ने चलन छ । अटो व्यवसायीहरुले पनि चाडपर्वकै बेलामा आफ्नो प्रडक्टलाई कसरी ग्राहकसम्म अधिकतम बिक्री गर्ने भनेर विभिन्न स्किम तथा अफरहरु ल्याउने गरेका छन् । जुन, विगतदेखि नै चल्दै आएको परम्परा समेत हो । यसपाली चाडपर्वका बेलामा कतिपय अटो व्यवसायीहरुले नगद छुट, बीमा सुविधासहित कतिपयले भने विदेश भ्रमणसम्म गर्न सक्ने गरी आफ्ना अफरहरु सार्वजनिक गरेका छन् ।

हेरौं, अटो कम्पनीले ल्याएका स्किमहरु निम्नानुसार छन् ।

एलएस अटो कम्पनीले एलइभी ०१ इभी गाडीको खरिदमा १ लाखसम्मको नगद छुट दिइरहेको छ । त्यस्तै, कम्पनीले एक लाख एक्सचेन्ज बोनस, गाडी खरिदमा २० प्रतिशत डाउन पेमेन्ट, निशुल्क बीमा, १० केजीको वासिङ मेशिन र जोडीका लागि ६ दिन सिंगापुर अथाव मलेसिया भ्रमण गर्न सक्ने गरी आफ्नो अफर सार्वजनिक गरेको छ ।

कम्पनीको इभी स्पेसिफिकेशनअनुसार, ६७.१२ किलोवाटको ब्याट्री, ५०० किलोमिटर रेन्ज, २१० मिमि ग्राउन्ड क्लियरेन्स, फास्ट चार्जर र ८ वर्षको वारेन्टीको सुविधा दिएको छ । त्यस्तै, होन्डाले चाडबाडका लागि दशैंमा होन्डा छानौं ‘चंगा उड्छ फरर’ योजना ल्याएको छ । कम्पनीले भदौ ७ गतेदेखि कात्तिक १४ गतेसम्म यो योजना लागु गर्दै होन्डा सिटी, सिटी इभी, इलेभेट, अमाजे, पाँचौ जेनेरेसन सिटीजस्ता गाडीहरुमा विभिन्न अफरहरु ल्याएको छ ।

जसमा कम्पनीले ४ लाखसम्मको नगद छुट, ५ वर्ष निःशुल्क सर्भिस, १ वर्ष निशुल्क बीमा, १ वर्ष रोड ट्याक्स निशुल्क, २५ हजारको एक्सचेन्ज बोनस, निःशुल्क एक्सेसरिज, २ वर्ष इन्जिन वारेन्टी र एकपटक रोडसाइड सहायता दिनेगरी आफ्ना अफरहरु सार्वजनिक गरेको छ ।

त्यस्तै, हुन्डाइ नेपालले पनि चाडपर्व लक्षित दशैं तिहार फेस्टिभल अफर योजनाअन्तरगत विभिन्न आकर्षक सुविधा तथा छुटको व्यवस्था गरेको छ । कम्पनीले आर्कषक नगद छुट, स्क्रयाच कार्डमार्फत थप १ लाख क्यासब्याक, दुइ लक्की बिजेताले हुन्डाइ औरा वा ग्रान्ड आइ १० एनआइओएस जित्ने मौका आम ग्राहकले पाउनेछन् । कम्पनीले १ वर्ष निःशुल्क कम्प्रिहेन्सिभ बीमाको समेत सुविधा दिएको छ ।

एमजीले पाथस् अफ स्माइल फेस्टिभल स्किम योजनाअन्तरगत विभिन्न अफरहरु सार्वजनिक गरेको छ । एमजी४ इभी, एमजी कोमेट इभी, एमजी जेडएस इभी, एमजी एस५ इभी र एमजी आइएम६ इभी गाडीहरुको खरिदमा थ्प्रै आकर्षक सुविधाहरु ल्याएको छ ।

जसमा कम्पनीले ग्राहकका लागि ४ लाखसम्म नगद छुट, निशुल्क कम्प्रेन्सिभ अटो पल्स बीमा, निःशुल्क ३ किलोवाट इभी होम चार्जर पाउन सकिनेलगायतका सुविधाहरु दिएको छ । त्यस्तै, बिवाइडीका इलेक्ट्रिक कारहरुको खरिदमा ५ वर्षसम्मको निःशुल्क सर्भिसिङ र १० वर्षका लागि ब्याट्री र मोटरमा विस्तारीत वारेन्टीको सुविधा दिएको छ । त्यस्तै टाटा र टोयटा मोडेलका गाडीहरुको खरिदमा पनि ग्राहकले विशेष अफर पाउन सक्नेछन् ।

त्यस्तै, सुजुकीले पनि यसपालीको चाडबाडलाई लक्षित गरेर दुई पाङ्ग्रे सवारीमा ‘दशैं आयो, क्यास पायो’ योजना सार्वजनिक गरेको छ । जसमा ७ हजार देखि ५ लाखसम्मको नगद छुट, एक्सचेन्ज तथा फाइनान्स सुविधा, ५ वर्षको वारेन्टी र निःशुल्क सर्भिसिङ, १ वर्षको रोड ट्याक्स निशुल्क र ‘सियोर सट’ योजनामा १० हजार रुपैयाँसम्मको छुट सुविधा समेत पाइने कम्पनीले जनाएको छ ।

यी बाहेक अन्य धेरै अटो कम्पनीहरुले पनि विभिन्न चाडपर्व लक्षित अफर तथा स्किम योजना ल्याइरहेका छन् ।