जिल्ला प्रहरी कार्यालय कञ्चनपुरका अनुसार अब भारतीय पक्षले नेपाल–भारत मैत्री बसलाई नेपाल प्रवेश गर्न अनुमति दिएको छ। साथै गड्डाचौकीस्थित ७ नम्बर सीमा पिल्लरसम्म सवारीसाधनको आवागमनसमेत सुरु भएको छ।
प्रहरी नायब उपरीक्षक (डीएसपी) सागर बोहराले जानकारी दिँदै भने, “यसअघि शारदा ब्यारेजसम्म मात्रै सवारीसाधन चल्ने अवस्था थियो, तर आजदेखि गड्डाचौकी नाकासम्मै यातायात सञ्चालनमा आएको छ। साथै नेपाल–भारत मैत्री बस पनि नेपाल भित्रिएको छ।”
भारतीय सीमासुरक्षा बल (एसएसबी) ले आजदेखि नेपाली नागरिकलाई नेपाली परिचयपत्र देखाएर भारत प्रवेश गर्न अनुमति दिन थालेको छ। यसअघि गत बुधबारदेखि एसएसबीले कुनै स्पष्ट कारण नखुलाइ नेपाली नागरिकको प्रवेशमा रोक लगाएको थियो।
गड्डाचौकी नाका सुदूरपश्चिम क्षेत्रको प्रमुख सीमा नाका हो, जहाँ दैनिक सयौं नागरिकको ओहोरदोहोर हुने गर्छ। नाका पुनः सञ्चालनमा आएसँगै स्थानीय र यात्रुहरूमा सहजता आएको छ।
