अरब न्यूजका अनुसार विश्वभरमा हाल साढे ३ करोड ऊँट छन् । त्यसमध्ये एक करोड ७० लाख अरब देशहरुमा रहेकोमा साउदी अरबमा अहिले २२ लाख रहेका छन् । साउदी अरबको कृषि मन्त्रालयले ती २२ लाख ऊँटहरुलाई पासपोर्ट जारी गरिने जानकारी दिएको छ ।
पासपोर्ट जारी भएपछि ऊँट पालन व्यवसाय थप व्यवस्थित हुने मन्त्रालयले दावी गरेको छ । साथै ऊँट पालन गर्ने व्यवसायीको समस्या पहिचान गर्न समेत सहयोग पुग्ने बताइएको छ ।
ऊँट विना मरुभूमीमा जीवन असम्भव रहेको विश्वाससहित साउदी अरबमा ऊँटलाई सफलताको प्रतिक मानिन्छ र हरेक चाडपर्वमा ऊँटलाई महत्व दिइन्छ । हरेक वर्ष ऊँटको ‘सुन्दरी प्रतियोगिता’ पनि आयोजना गरिन्छ ।
साउदी अरब ऊँटको दूध निर्यात प्रमुख देश हो । यहाँको साबनी कम्पनीले उत्पादन गर्ने ऊँटको दूध विश्वका २५ देशमा निर्यात हुँदै आएको छ । ऊँटको दूधबाट बनाइने आइसक्रिम विशेष महत्वको मानिन्छ । त्यस्तै ऊँटको छालाबाट बनाइने ज्याकेट, बेल्टहरु पनि निकै बलियो र महंगो मूल्यमा विक्री हुने गरेको छ । त्यहीकारण साउदी सरकारले सन् २०३० सम्म ऊँट र त्यसबाट हुने आम्दानीलाई राष्ट्रिय आयको प्रमुख स्रोतको रुपमा विकास गर्ने घोषणा यस अगाडि नै घोषणा गरिसकेको छ । अहिले पासपोर्ट वितरण गर्ने घोषणालाई त्यसैको आधार मानिएको सरकारले जारी गरेको सन्देशमा उल्लेख गरिएको छ ।
