मंगलबार संसदमा राष्ट्रपतिले पाठ गरेको सरकारको नीति र कार्यक्रममा शेयर बजार प्रति केही ठोस प्रस्ताव आउने विश्वास थियो ।

तर, सरकारले यस अघि भएका अध्ययनहरुले दिएको सुझावलाई कार्यान्वयन गर्ने भन्ने काइते भाषा प्रयोग गरेर औपचारिकता पुरा गरेको जस्तो देखाउँदै यथार्थमा भने पूँजी बजार र त्यसका लगानीकर्तामाथि मजाक नै गर्यो । फलतः नीति र कार्यक्रममार्फत केही होला कि भन्ने आश गरेका लगानीकर्ताहरु निराश भए । आशैआसमा मंगलबार बढेको शेयर सूचकाँक विहीबार उल्टो दिशामा गयो ।

शेयर बजारमा दिनदिनै मात्र होइन, छिनछिनमै उतार चढाव आउँछ, कहिले अस्वभाविक घटेर ‘सर्किट ब्रेकर’ लाग्छ त कहिले बढेर ‘सर्किट ब्रेकर’ लाग्छ । यस्ता उतार चढाव शेयर बजारको लागि ‘नियमित आकस्मिकता’ बाहेक केही होइन, हुँदैन ।

तर, मंगलबार र बुधबारको नेप्से परिसूचकमा आएको उतार चढाव केवल ‘नियमित आकस्मिकता’ मात्र होइन, सरकारप्रतिको अविश्वासको प्रतिविम्ब हो । शेयर बजारप्रति सरकारी बेवास्तालाई देखाउने बिडम्बनापूर्ण सूचक हो ।

नेपालमा मात्र होइन, विश्वभर नै सरकारका मुख्य कार्यक्रमहरु घोषणा हुने समय र घोषणा भइसकेपछिको प्रतिकृयाको सबैभन्दा छिटो असर पूँजी बजारमा पर्छ । त्यसैको प्रतिफल हुनुपर्छ, हिजो केही होला कि भन्ने आशमा बढेको नेप्से परिसूचक नीति र कार्यक्रममा ‘सम्बोधन गरिएको छ’ भनेर फगत औपचारिकता निभाउने काम मात्र भएपछि लगानीकर्ताहरु निराश भएका छन् ।

औपचारिकता निभाउनको लागि भन्दा कार्यान्वयनमुखी भएर ठोस कार्यक्रम आउने अपेक्षालाई सरकारले पुरै उपेक्षा गरेको छ । नीति र कार्यक्रमलाई आधार बनाएर बजेट घोषणा गरिने हुँदा अब केही दिनपछि घोषणा गरिने बजेटमा सरकारले कुनै उल्लेख्य कदम चाल्ने छैन, केवल ‘गरेकै छ नि’ भन्ने पार्नको लागि र लगानीकर्ताहरुको लागि थामथुम पार्ने प्रयास गरिनेछ भन्ने स्पष्ट भएको छ ।

त्यसो त सरकारले लगानीकर्ता माथि घात गरेको यो नै पहिलो पटक होइन । तथ्य खोतल्ने हो भने सरकारले शेयर बजार र लगानीकर्तामाथि हरेक वर्ष पटक पटक मजाक गर्ने गरेको छ, उनीहरुलाई घात गर्ने गरेको छ ।

पहिलो त उस्ले पूँजी बजारको विकास र विस्तारको लागि ठोस कार्यक्रम नै ल्याउदैँन, कहिले काँही कुनै कार्यक्रम ल्याए पनि कार्यान्वयन नगरी अलपत्र पारिन्छ । यदि त्यस्तो हुँदैनथ्यो भने पूँजी बजारमा नेप्से स्थापनाको करिब ३ दशकमा सरकारले निकै काम गरिसक्ने थियो । तर, सरकार अहिले पनि पूँजी बजारलाई महत्व नै दिइरहेको छैन । त्यसैले अरु देशका पूँजी बजार वैकल्पिक लगानीको भरपर्दाे विकल्प बनिरहेको बेला नेपालको पूँजी बजार भने भरखर बामे सर्दैछ, जुन दूर्भाग्यपूर्ण छ ।