अमेरिकी करले भारतका शीर्ष व्यावसायिक परिवारहरूको चिन्ता बढाएको छ। उद्योग विज्ञहरूका अनुसार,रिलायन्स इन्डस्ट्रीज,अदानी समूह र आर्सेलर मित्तल जस्ता कम्पनीहरूले यी करका कारण ठुलो घाटा भोग्न सक्छन्।

यी कम्पनीहरूले करको मारबाट बच्न आफ्नो व्यापार रणनीति परिवर्तन गरिरहेका छन्। केही कम्पनीहरूले अमेरिका लगायत कम कर भएका देशहरूमा आफ्नो उत्पादन एकाइहरू स्थापना गरिरहेका छन्,जबकि केहीले यी देशहरूमा पहिले नै अवस्थित आफ्ना सहायक कम्पनीहरू मार्फत निर्यात गर्ने विचार गरिरहेका छन्।

यही मेसोमा केही कम्पनीहरुले तयारी पोशाकलगायतको उत्पादन गर्ने बारेमा सोधपुछ गरेको नेपाली उद्योगी व्यापारीहरु बताउँछन् । अमेरिकाले भारतबाट निर्यात हुने सामानमा ५० प्रतिशत आयात कर लगाउँदा दक्षिण एसियालीहरु मुलुकहरुमध्ये नेपाल र भुटानलाई भने १० प्रतिशत मात्रै आयात कर लगाउने गरेको छ । यही कर भिन्नताको अवसरको सदुपयोग गर्न पछिल्लो समय धेरै भारतीय उद्योगी व्यापारीहरुले आफ्ना समकक्षी नेपाली उद्योगी व्यापारीहरुसँग सम्पर्क बढाइरहेका छन् । अहिले नेपालको वित्तीय प्रणालीमा तरलता प्रचुर मात्रामा रहेको छ भने व्याज दर इतिहासकै न्यून विन्दुमा रहेको छ । यस्तो समयमा भारतीय लगानी बढाउन सकियो भने त्यसले देशको अर्थतन्त्रलाई टेवा दिन ठूलो मद्दत गर्ने उद्योगी व्यापारीहरु बताउँछन् ।

नेपाल चेम्बर अफ कमर्सका पूर्व अध्यक्ष राजेन्द्र मल्ल अहिलेको अवसरलाई उपयोग गरेर नेपालमै भ्यालु एड हुने गरी उद्योगहरु स्थापना गर्नुपर्नेमा जोड दिन्छन् । अहिले भारत र चीनमा उत्पादन हुने सामानमा उच्च कर लाग्ने गरेको छ । अमेरिकी कर नीतिलाई नेपालले पाएको अवसरको रुपमा लिएर त्यसको पूर्ण उपयोग गर्नुपर्ने पूर्व अध्यक्ष मल्ल बताउँछन् । ‘नेपालमा खासै भ्यालु एडिसन नभएर खाली ‘नेपालमा बनेको’ भनेर लेभलिङ मात्र गर्ने खालको उद्योगलाई प्राथमिकता दिनु हुँदैन।’–उनले भने–‘नेपालकै जनशक्ति र कच्चा पदार्थ खपत हुने गरी उद्योग स्थापना गर्न जोड दिनुपर्छ ।’

यसअघि, ह्वाइट हाउसका व्यापार सल्लाहकार पिटर नवारोले भारतका केही धनी परिवारहरूलाई रूसबाट सस्तो कच्चा तेल खरिद गरेर नाफा कमाएको आरोप लगाएका छन्। यी कम्पनीहरूले अमेरिकी करबाट बच्न आफ्नो रणनीति द्रूत रूपमा परिवर्तन गरिरहेका छन् । नेपालको सरकार र निजी क्षेत्र दीर्घकालीन योजनाका साथ अगाडि बढेमा अहिले अमेरिकी कर नीतिको लाभ लिन सकिनेमा निजी क्षेत्र ढुक्क रहेका छन् । कुन भारतीय घरानाले के सोच्दैछ त ।

रिलायन्स इन्ड: मुकेश अम्बानी

कम्पनीले पहिलो ६ महिनामा रूसबाट १४ करोड २० लाख ब्यारेल तेल आयात गरेको थियो। ५ हजार करोड रुपैयाँ बचत गरेको थियो। अमेरिकामा पेट्रोल र ऊर्जा व्यवसाय छ। ६ लाख करोडको ओटुसी व्यवसायमा आम्दानीको ४५% निर्यातबाट हुन्छ।

भारत फोर्जः बाबा कल्याणी

भारत फोर्जले गत वर्ष अमेरिकालाई लगभग १७०० करोड रुपैयाँ बराबरको सामान बेचेको थियो। यो उसको आम्दानीको लगभग १०% हो। कम्पनीले चालु आर्थिक वर्षमा आफ्नो अमेरिकी निर्यातको लागि सावधानी अपनाएको छ।

आइसर मोटर्सः विक्रम लाल

मध्यम आकारका बाइकहरूको अमेरिकी बजारमा ८% हिस्सा। मार्चमा अमेरिकामा ९,००० बाइक पठाइयो। ट्रम्पको शुल्कबाट बच्न कम्पनीले आफ्नो स्टक अमेरिकाको छिमेकी देशको गोदाममा सार्ने सोचमा छ।

आर्सेलरः लक्ष्मी मित्तल

२०२४ मा अमेरिकामा ६० हजार करोड रुपैयाँ बराबरको स्टील निर्यात गरियो। नाफा १५ करोड डलरले घट्ने आशंका छ। कम्पनीले अमेरिकामा उत्पादन बढाएर करको प्रभाव घटाउँदैछ।

बिर्ला समूहः कुमार मंगलम

आदित्य बिर्ला समूह कपडा र धागो निर्माता र निर्यातकर्ता हो। समूहको ६० भन्दा बढी देशहरूमा व्यापार छ। समूहले अमेरिकामा १५ अर्ब डलर लगानी गरेको छ। अधिग्रहण मार्फत अमेरिकामा उत्पादन बढाउन जोड दिइँदैछ।

अदानी समूहः गौतम अदानी

यदि विदेशी व्यापार प्रभावित भयो भने, १५ पोर्ट, टर्मिनल र २७% बजार हिस्सा भएको पोर्ट अपरेटर अदानी पोट्र्सले घाटा बेहोर्न सक्छ। समूहका अधिकांश सौर्य मोड्युलहरू अमेरिकामा निर्यात गरिन्छ, यो प्रभावित हुन सक्छ।