अहिले करिब २५ लाख लाइसेन्स छाप्ने तयारी गरिरहेको यातायात व्यवस्था विभागले अब छापिने लाइसेन्समा चिप हटाउने भएको छ ।
विभागले गत बुधवार सुरक्षण मुद्रण केन्द्रसँग छ महिनाभित्र १२ लाखको सङ्ख्यामा नयाँ प्रकारको स्मार्ट कार्ड छापेर दिने तर त्यसमा चिप नराख्ने सहमति गरेको हो । जेनजी आन्दोलनको कारण प्रिन्टिङ मेशीन क्षतिग्रत भएकोले लाइसेन्समा केही वर्षदेखि राखिदै आएको चिप हटाउन लागिएको दावी विभागका अधिकारीहरुले गरेका छन् । अहिले पनि प्रिन्ट हुन बाँकी रहेका छ लाख वटा चिपयुक्त कार्डहरू भए पनि त्यसलाई समेत वितरण नगरि चिप नराखिएका नयाँ लाइसेन्स छापेर वितरण गर्ने तयारी गरिएको हो ।
नयाँ लाइसेन्समा क्यूआर कोड भने राखिने भएको छ । त्यसमा देखिने र नदेखिने सुरक्षाका विभिन्न ३४ वटा फिचर रहेको विभागका अधिकारीहरुले जानकारी दिएका छन् ।
विभागस्रोतका अनुसार तीन वर्षदेखि वितरण हुन नसकेका सवारीचालक अनुमतिपत्रहरू सोही अनुसार क्रमबद्ध रूपमा छापिने र विदेश जानेहरूलाई प्राथमिकता दिइने भएको छ ।
