गत चैत ६ गते शुक्रबार नेपाली बजारमा सुन प्रतितोला २ लाख ९४ हजार ५०० रुपैयाँमा कारोबार भएको थियो। तर, एक हप्ताको अन्तरालमा सुनको मूल्यमा भारी गिरावट भएर प्रतितोला दुई लाख ८१ हजार रुपैयाँमा झरेर कारोबार भएको छ ।
यस हप्तामा अधिकांश दिन सुनको मूल्य निरन्तर घटेको छ । चैत ८ गते आइतबारको बजारमा सुन प्रतितोला दुई लाख ८२ हजार रुपैयाँमा कारोबार भएको थियो। त्यसैगरी चैत ९ गते सोमबार दुई लाख ८२ हजार ५०० रुपैयाँ पुगेको सुनको मूल्य मंगलबार १० गते उल्लेख्य घटेर दुई लाख ७३ हजार ९०० रुपैयाँमा झरेको थियो।
चैत ११ गते बुधबार भने सुनको मूल्यमा बढोत्ती भएको थियो । सो दिन सुन प्रतितोला दुई लाख ८८ हजार ५०० रुपैयाँमा कारोबार भएको थियो। बुधबार बढोको सुनको मूल्य बिहीबार टिक्न सकेन । बिहीबारको बजारमा सुनको मूल्य प्रतितोला दुई हजार ९०० रुपैयाँले घटेर दुई लाख ८५ हजार ६०० रुपैयाँमा झर्यो । साताको अन्तिम दिन चैत १३ गते, शुक्रबार नेपालीबजारमा सुनको मूल्य प्रतितोला दुई लाख ८१ हजार रुपैयाँमा कारोबार भएको थियो ।
अन्तर्राष्ट्रिय बजारमा मध्यपूर्वी क्षेत्रको युद्ध र भू–राजनीतिक तनाव कायमै रहेपनि सुन र चाँदीको मूल्यमा भने अपेक्षित वृद्धि हुनुको साटो निरन्तरको गिरावट भएको छ । यो अवधिमा विश्व बजारमा लगानीकर्ताहरू सुरक्षित लगानी ‘क्रुड अयल’ (कच्चा तेल) खरिद तर्फ आकर्षित हुँदा सुन चाँदीको मूल्य प्रभावित भएको जानकारहरुको बुझाई छ ।
