तर, पछिल्लो खोज अनुसन्धानले केही वर्ष भित्रै त्यो अवस्था आउन सक्ने देखाएको छ । सम्भवतः अबको २ महिना भित्रै त्यसबारेमा सबै कुरा छर्लङग हुनेछ ।
खानी तथा भूगर्भ विभाग र चीनको चाइना जिओलोजिकल सर्वेले दैलेखको भैरवी गाउँपालिकाको जलजलेमा गरिरहेको अन्वेषणको क्रममा प्राकृतिक ग्यास रहेको स्पष्ट संकेत फेला परेका छन् । हाल भइरहेको अन्वेषणको काम फागुन २८ (फेब्रुअरी २८) सम्म सक्ने गरि तयारी भइरहेको छ । अहिले ३५ जना प्राविधिक र विज्ञहरूसहितको टोलीले स्थानीय भैरवी गाउँपालिकाको सहयोगमा काम अन्वेषणको काम गरिरहेको छ ।
४,००० मिटर अर्थात ४ किमी गहिराइसम्म ‘ड्रिलिङ’ गरेर नमुना निकाल्ने गरि भइरहेको अन्वेषणको काममध्ये शनिबारसम्म ३,९४४ मिटर गहिराइसम्म खनिएको छ । अब ५६ मिटर मात्र खन्न बाँकी छ । ड्रिलिङका क्रममा २,२०० मिटरको गहिराइबाटै ग्यास भेट्न सुरु भएको थियो र त्यसभन्दा तलको गहिराइमा खन्दै जाँदा विभिन्न तहमा ग्यासको मात्रा पनि बढिरहेको छ ।
विभागका वरिष्ठ भूगर्भविद् गणेशनाथ त्रिपाठीका अनुसार अहिलेसम्मको ‘ड्रिलिङ’ बाट प्राप्त नमुनाहरु हेर्दा त्यहाँ ग्याँस रहेको स्पष्ट संकेत भेटिएको छ । तर, त्यो ग्याँस कुन स्तरको हो र त्यो व्यावसायिकरूपमा उपयुक्त छ छैन भन्ने कुरा थप अध्ययन अनुसन्धानपछि पुष्टि हुने र त्यसको लागि थप केही समय लाग्ने त्रिपाठीको भनाइ छ ।
विभागका अनुसार अहिलेको अन्वेषण सकिएपछि त्यसका नमुनाहरु थप अध्ययनको लागि चीन पठाइनेछ । चीनको ल्यावमा गरिने परिक्षणपछि बल्ल वास्तविक अवस्था पत्ता लाग्नेछ ।
भैरवी गाउँपालिकाकी अध्यक्ष रीताकुमारी शाही अहिलेको अन्वेषणले त्यहाँ प्राकृतिक ग्याँसको स्रोत रहेको स्पष्ट भएको भन्दै त्यो व्यवसायीकरुपमा पनि सफल भएमा त्यसले नेपालको आर्थिक विकासमा छलाङ मार्ने बताउंछिन् । ‘अहिलेको अन्वेषण हाम्रो गाउँपालिकाको लागि मात्र नभएर देशकै लागि अन्त्यन्त उत्साहजनक रहेको छ’ शाहीको भनाइ छ ।
अरू ठाउँमा पनि पेट्रोलियम पदार्थ पाइने
दैलेखको भैरवी गाउँपालिकासँगै पाल्पाको तानसेन, कैलालीको धनगढी, बाँकेको नेपालगन्ज, चितवनको पहाडी क्षेत्र, सर्लाहीको मलंगवा, पर्साको बीरगन्ज, धनुषाको जनकपुर, सप्तरीको राजविराज र मोरङको बिराटनगर क्षेत्रमा पनि पेट्रोलियम पदार्थ रहेको आशंकामा अन्वेषण शुरु गर्ने तयारी भैरहेको छ । अहिलेसम्मको अनुसन्धानहरुबाट नेपालको दक्षिणी भाग, चुरे र महाभारत आसपासको क्षेत्रमा पेट्रोलियम हुनसक्ने सम्भावना देखिएको छ ।
