अझै ३ वटा वाणिज्य बैंकले बिग मर्जरलाई प्राथमिकतामा नै राखेका छन्। तिनीहरुले उपयुक्त पार्टनर भेटेमा मर्जर गर्ने बताउँदै सो प्रक्रिया अगाडि बढाउने जिम्मा सञ्चालक समितिलाई दिने विशेष प्रस्ताव पारित गराएका छन् ।
सिटिजन्स बैंक इन्टरनेसनल, नबिल बैंक र प्राइम कमर्सियल बैंकले मर्जर तथा एक्विजिसनको एजेन्डा राख्दै यसको अख्तियारी बैंकको सञ्चालक समितिलाई दिने प्रस्ताव पारित गराएका छन् । नेपाल एसबीआई बैंकले साधारण सभाको लागि जारी सूचनामा पनि सोही मर्जर एन्ड एक्विजिसनको एजेन्डा उल्लेख छ यद्यपि एसबीआई बैंकको साधारण सभा सम्पन्न हुन बाँकी छ । प्राइम कमर्सियल र सिटिजन्सले ‘ख’ र ‘ग’ वर्गका विकास बैंक र फाइनान्सलाई आफूमा गाभे पनि समकक्षी ‘क’ वर्गका बैंकसँग मर्जरमा गएका छैनन। भारतको एसबीआई बैंकको लगानी रहेको नेपाल एसबीआई बैकले भने एफपीओ निष्काशन गरेर आफ्नो पुँजी ८ अर्ब पुर्याएको थियो।
नबिल बैंकले भने गत वर्ष मात्रै नेपाल बंगलादेश बैंकलाई आफूमा गाभेको थियो । यसअघि बैंकले युनाइटेड फाइनान्सलाई समेत आफूमा गाभेको थियाे । मर्जरका बाबजुद पनि पुँजी कोष टाइट हुँदै गएपछि बैंकले मर्जरको बाटो खुला राखेको हो । बैंकले तोकिएको पुँजी कोष पुर्याउन ८ प्रतिशतको अभिमोच्य असञ्चित अग्रधिकार शेयर जारी गर्ने प्रस्ताव समेत विशेष साधारण सभा गराएर पारित गरेको भए पनि अग्रािधकार शेयर जारी गर्न राष्ट्र बैंकबाट अनुमति पाएको छैन ।
मर्जरमा जाने एजेन्डा राखेका ४ वाणिज्य बैंकमध्ये नबिल बैंक र प्राइम कमर्सियल बैंकले गत वर्षको नाफाबाट नगद लाभांश मात्रै बाँडेका थिए । नबिलले यसपटक १० प्रतिशत र प्राइम कमर्सियलले ५ प्रतिशत नगद लाभांश बाँडे । सिटिजन्सले ४ प्रतिशत बोनस शेयर दियाे भने नेपाल एसबीआई बैंकले भने बोनस र नगदको अनुपात मिलाएर लाभांश घोषणा गरेकाे छ। एसबीआई बैंकले ३.८ प्रतिशत बोनस र ६.८५ प्रतिशत नगद गरेर १०.६५ प्रतिशत लाभांश दिने प्रस्ताव गरेकाे छ ।
अहिलेसम्म ७ वटा वाणिज्य बैंकले साधारण सभा सम्पन्न गरिसकेका छन् भने ९ वटा वाणिज्य बैंकले पुस मसान्तभित्रै साधारण सभा गर्ने गरी सूचना जारी गरिसकेका छन् । अझै सरकारी लगानी रहेको नेपाल बैंंकसहित नेपाल इन्भेष्टमेन्ट मेगा बैंक, एनआईसी एसिया बैंक र कुमारी बैंकले भने साधारण सभाको मिति घोषणा गरेका छैनन । सम्भवत यी चार वटा बैकको साधारण सभा पुस मसान्तभित्र सम्पन्न हुने छैन ।
