नेपाल राष्ट्रिय यातायात व्यवसायी महासंघका अनुसार, काठमाडौंदेखि पश्चिम नेपालतर्फको सडकमार्गमा अवरोध नभएको र गृह मन्त्रालयले पनि यातायात सञ्चालन गर्न आग्रहसहित पत्राचार गरेकाले सोमबारदेखि यातायात सञ्चालन गर्ने जनाएको छ ।
महासंघका अध्यक्ष विजय स्वाँरले गृह मन्त्रालयको सुचना आएकाले भोलिबाट अवरोध नभएका ठाउँमा गाडी चलाउने बताए । ‘गृह मन्त्रालयको सुचना आएको छ । अवरोध नभएका ठाउँमा भोलिदेखि नै गाडी चल्छन् ।’ उनले भने ।
उनका अनुसार, काठमाडौंदेखि मुग्लिन, नारायणगढ, बुटवल र पोखरासम्म त्यति समस्या नभएकाले सोमबारदेखि यातायात सुचारु हुनेछ । सकभर गाडी सञ्चालन गर्दा पहाडी र पहिरोको जोखिम भएका स्थानहरु उज्यालोमै गाडी पास गराउने गरी यातायात सुचारु हुने उनले बताए ।
पूर्वी नेपालका विभिन्न जिल्लामा भने पहिरोका कारण राजमार्ग नै अवरुद्ध भएकाले तत्काल यातायात सञ्चालन गर्न नसकिने उनले बताए । हाललाई पश्चिम नेपालतर्फका राजमार्गमा यातायात सुचारु हुने उनको भनाइ छ ।
‘तत्काल पूर्वी नेपालतर्फ जाने राजमार्गहरु अवरुद्ध छन् । पहिरो हटाएर क्लियर गरेपछि यातायात सुचारु हुन्छ,’उनले भने,‘हाललाई काठमाडौंबाट पश्चिम नेपालतर्फको यातायात खुलाउँछौं ।’
