सोमबार अर्थ मन्त्रालयको सुवर्ण हलमा बजेट कार्यान्वयन गर्ने प्रमुख मन्त्रालयका सचिवहरूसँगको विशेष बैठक सुरु भएको हो। अर्थमन्त्री डा. वाग्लेको अध्यक्षतामा बसिरहेको उक्त बैठकमा चालु आर्थिक वर्षको बजेटलाई नतिजामुखी बनाउन र कार्यान्वयनका क्रममा देखिन सक्ने चुनौतीहरूलाई सम्बोधन गर्ने विषयमा केन्द्रित रहेर छलफल भइरहेको छ।
बैठकमा राष्ट्रिय योजना आयोगका उपाध्यक्ष डा. गुणाकर भट्ट र अर्थ सचिव डा. घनश्याम उपाध्यायको विशेष उपस्थिति रहेको छ। यस्तै, बजेटको ठूलो हिस्सा ओगट्ने र कार्यान्वयनमा महत्वपूर्ण भूमिका खेल्ने भौतिक पूर्वाधार तथा यातायात, उद्योग वाणिज्य तथा आपूर्ति, कृषि तथा पशुपन्छी विकास, स्वास्थ्य तथा जनसंख्या, र शिक्षा मन्त्रालयका सचिवहरूको सहभागिता रहेको छ।
यसका साथै परराष्ट्र, संस्कृति पर्यटन तथा नागरिक उड्डयन, श्रम रोजगार तथा सामाजिक सुरक्षा, महिला बालबालिका तथा ज्येष्ठ नागरिक, गृह, र रक्षा मन्त्रालयका सचिव एवं उच्च अधिकारीहरू पनि बैठकमा सहभागी छन्।
बैठकमा सहभागी मन्त्रालयका सचिवहरूले आ–आफ्नो मन्त्रालयका प्राथमिकता, चालु आयोजनाको अवस्था र बजेट कार्यान्वयनका बारेमा ब्रिफिङ गर्ने कार्यक्रम छ। अर्थमन्त्री डा. वाग्लेले बजेट विनियोजन मात्र ठूलो कुरा नभई यसको समयमै कार्यान्वयन र त्यसबाट प्राप्त हुने प्रतिफल मुख्य हुने भएकाले सबै मन्त्रालयहरू बीच समन्वय हुनुपर्नेमा जोड दिँदै आएका छन् ।
मन्त्रालयले समयमै बजेट कार्यान्वयन प्रक्रियालाई चुस्त बनाउन यो छलफल आयोजना गरेको हो। यस छलफलबाट प्राप्त सुझावका आधारमा चालु आर्थिक वर्षको बजेटको कार्यान्वयन गरिने भएकाे हाे।
