शिबम् सिमेन्टको शेयर मूल्य आज एकै दिन १० प्रतिशतले बृद्धि भएको छ । सोमबार प्रतिकित्ता ५४० रुपैयाँको हाराहारीमा कारोबार हुँदै आएको शिवम् सिमेन्टको शेयर मूल्य मंगलबार १० प्रतिशतले बढेर ५९४ रुपैयाँ पुगेको छ ।
शेयर मूल्य मात्र होइन, कारोबार रकम पनि यस दिन सबै भन्दा बढी भएको छ । शिवम् सिमेन्टको आज एकै दिन ३७ करोडको शेयर किनबेच भएको छ ।
यसरी शेयर मूल्य बढ्नुलाई कम्पनीले पहिलो पटक बोनस शेयर दिनुलाई लिएको छ । अहिले ४ अर्ब ४० करोड चुक्ता पुँजी भएको शिवम् सिमेन्टले पुनः चुक्ता पुँजी बढाउँदै जाने रणनीति बनाएको छ ।
कम्पनीले परम्परागत ‘रुट’ लाई बदल्दै नगदबाट बोनसमा ‘युटर्न’ हुन थालेपछि लगानीकर्ता शिवम् सिमेन्टको शेयर खरिद गर्न आकर्षित भएका हुन् ।
केही दिन अघिदेखि नै शिवम् सिमेन्टले नगदको सट्टा बोनस लाभांश घोषणा गर्दै छ भन्ने हल्ला बजारमा चलिरहेको थियो । त्यसबेला नै शिवम् सिमेन्टको शेयर खरिद गर्दा हुने हल्ला बजारमा फैलिएको थियो ।
त्यही बेलादेखि नै शिवम् सिमेन्टको शेयर किनेर ‘होल्ड’ गर्न थालेका लगानीकर्ताले सांकेतिक रुपमा ‘ओम नमः शिवाय’ भन्न थालेका थिए ।
प्रत्येक वर्ष बोनस शेयर दिँदै जाने र कम्पनीलाई ‘नम्बर वान’ बनाउँदै लैजाने योजनामा कम्पनीका सञ्चालकहरु पुगेकाे स्रोतको दावी छ । त्यही निर्णय सार्वजनिक भएसँगै बजारमा शिवम् सिमेन्टको शेयर ‘हट केक’ बनेकाे हो ।
बाटाे परिवर्तन गर्दै इतिहासमा नै पहिलो पटक शिवम् सिमेन्टले बोनस शेयर दिने निर्णय गरेकाे छ । शिवम् सिमेन्टले गत आर्थिक वर्षसम्मको सञ्चित मुनाफाबाट शेयरधनीलाई १५ प्रतिशत लाभांश वितरण गर्ने भएको छ । आज बिहान बसेको सञ्चालक समितिको बैठकले शेयरधनीहरुलाई १४.२५ प्रतिशत बोनस शेयर र कर प्रयोजनको लागि ०.७५ प्रतिशत नगद लाभांश वितरण गर्ने प्रस्ताव गरेको छ ।
गत वर्ष शिवम् सिमेन्टले १०.५३ प्रतिशत नगद लाभांश मात्र दिएको थियो । गत वर्ष भन्दा यसवर्ष शिवम् सिमेन्टले बढी लाभांश त्यसमाथि पनि बाेनस लाभांश दिएको हो ।
शिवम सिमेन्टले बढीमा २९ प्रतिशत नगद लाभांश समेत दिएको रेकर्ड छ । कम्तीमा १० प्रतिशत नगद लाभांश दिँदै आएको शिवम् सिमेन्टले यसपाली १५ प्रतिशत बोनस शेयर दिएको हो ।
शिवम् सिमेन्टको अधिकत मूल्य १८०० सम्म पुगेको थियो । यस कम्पनीको शेयर मूल्य न्यूनतम ३०५ रुपैयाँसम्म झरेको थियो । पछिल्लो समय शिवम् सिमेन्टको शेयर मूल्य निरन्तर उकालो लाग्दै गएको छ ।
