हाथवेको शेयर मूल्य पहिलाको तुलनामा प्रतिकित्ता करिव २ सय रुपैयाँले घटिसकेको छ । निरन्तर रुपमा बढ्दै गएको हाथवेको शेयर मूल्य घट्नुलाई ठूला शेयर खेलाडीले हात झिकेकालाई लिने गरिएको छ ।
उच्चतम मूल्य पुर्याएर ठूला खेलाडीले बिक्री गरेकोले अहिले हाथवेको शेयर मूल्य निरन्तर ओरालो लाग्न पुगेको एक लगानीकर्ताले बताए ।
अंकित मुल्य ५० रुपैयाँको शेयर १ हजार १ सय २३ रुपैयाँसम्म पुगेपछि हाथवे इन्भेष्टमेन्ट केही लगानीकर्ताले राम्रै नाफा कमाएका थिए । गत आर्थिक वर्षको नाफाबाट हाथवेले १० प्रतिशत बोनस शेयर बितरण गर्ने प्रस्ताव गरेको थियो । उक्त बोनस लाभांश हात पार्न पनि लगानीकर्ताले उच्च मूल्यमा शेयर खरिद गरेका थिए । हाथवे इन्भेष्टमेन्टले सर्वसाधारणलाई २ करोड ३४ लाख कित्ता शेयर जारी गरेको थियो ।
पहिलो कारोबारको लागि नेप्सेले ९५ रुपैयाँ ९ पैसादेखि २८५ रुपैयाँ २७ पैसासम्मको कारोबार रेञ्ज प्रदान गरेको थियो । पहिलो कारोबार नै २८५ रुपैयाँ २७ पैसाबाट सुरु भएको थियो । पछि घटेर २७९ रुपैयाँसम्म आएको थियो ।
केही समय पहिलासम्म हाथवेको शेयर किन्न धेरै झुम्मिएका थिए । अहिले भने उक्त शेयर किन्न लगानीकर्ता त्यति इच्छुक देखिएका छैनन् । जसका कारण शेयर मूल्य निरन्तर ओरालो लाग्दै गएको छ ।
