नेपाल राष्ट्र बैंकले चालु आर्थिक वर्षको पहिलो त्रैमासिक मौद्रिक नीति समीक्षामार्फत व्याज दर घटाउने र ऋणको माग बढाउने गरी संशोधन गरेपछि पुँजी बजार एकदमै ठूलो उतारचढाव आएको छ । केन्द्रीय बैंकले मौद्रिक नीतिको समीक्षा गर्नु अघिको बजार र मौद्रिक नीतिको समीक्षा गरिसकेपछिको दुई कारोबार दिनमा कुनै कम्पनीको शेयर मूल्यमा झन्डै ३२ प्रतिशतसम्मको उतारचढाव देखिएको छ ।

पुँजी बजारका लगानीकर्ताले माग गरे अनुसारका केही मागहरु सम्बोधन गरेपछि आइतबार नेप्सेमै सर्किट लागेर कारोबार बन्द भयो । सोमबारको कारोबार भने एकदमै भोलाटाइल भएर थोरै अंकले घटेर बन्द भयो । आइतबार नेप्से परिसूचक ६ प्रतिशतले वृद्धि हुँदा १ सय ११ अंकको वृद्धि हुँदा नेप्से परिसुचक १९६३.९८ विन्दुमा उक्लियो । सोमबार नेप्से परिसूचकमा एकदमै ठूलो उतारचढाव देखियो । सोमबार अधिकतम १९८९.७२ अंकसम्म नेप्से उक्लियो भने न्यूनतम १९२८.७६ विन्दुसम्म झरेर दिनभरिमा ६१ अंकको उतारचढावपछि अन्तिममा १९४८.५७ विन्दु्मा बन्द भयो । मौद्रिक नीतिको समीक्षा अघि र समीक्षा पछिको दुई दिनको कारोबार दिनमा १७.९८ देखि ३१.९३ प्रतिशतसम्म कम्पनीको शेयरमूल्य घटबढ भएको देखियो ।

नेप्से परिसूचकलाई उतारचढावयुक्त बनाउन धेरै कम्पनीहरुको मुख्य भूमिका रहेको छ । मेरो लगानीले दुई दिनमा मूल्यमा धेरै उतारचढाव भएको २० कम्पनी छनोट गरेको छ । दुई दिनमा सबैभन्दा बढी मूल्य उतारचढाव भएको कम्पनी सीवाईसी नेपाल लघुवित्त वित्तीय संस्था लिमिटेड रहेको छ । मौद्रिक नीति समीक्षा अगाडि ८ सय ८२ रुपैयाँ रहेको यो कम्पनीको मूल्य आइतबार अधिकतम ११ सय ६४ रुपैयाँसम्म पुगेर अन्तिममा ११ सय ५५ रुपैयाँमा कारोबार बन्द भयो । बिहिबारको अन्तिम मूल्यबाट सोमबार उच्च मूल्यसम्म पुग्दा कम्पनीको मूल्यमा ३१ दशमलब ९३ प्रतिशतले वृद्धि भएको छ ।

त्यसैगरी हाइड्रोपावर सेक्टरका धेरै कम्पनीहरुको मूल्यमा २० प्रतिशतले भोलाटाइल भएको देखिएको छ । भर्खरै कारोबार खुलेको त्रिशुली जलविद्युत कम्पनीको शेयर बिहीबार २६८ रुपैयाँ रहेकोमा सोमबार अधिकतम ३ सय ४३ रुपैयाँ ९० पैसासम्म पुग्यो भने अन्तिममा ३ सय ८ रुपैयाँ ९० पैसामा बन्द भयो । कम्पनीको शेयर मूल्यमा २८ दशलमब ३२ प्रतिशतले उतारचढाव भएको देखिएको छ । त्यस्तै धेरै मूल्यमा भोलाटाइल भएको कम्पनीमा मोलुङ हाइड्रोपावर कम्पनी रहेकाे छ । कम्पनीको शेयर मूल्यमा २५ दशमलब ७५ प्रतिशतले उतारचढाव देखिएको छ ।

हाथवे इन्भेष्टमेन्ट नेपालको शेयर मूल्य गत बिहीबार ४ सय ३६ रुपैयाँ रहेकोमा दुई दिनमा झन्डै १ सय रुपैयाँ भन्दा बढीले बढेर ५ सय ४४ रुपैयाँ ५० पैसा पुगेको छ । लगानी समूह अन्तर्गत रहेको यो कम्पनीले हालै मात्र आइपीओ जारी गरेर सूचीकृत भएको कम्पनी हो । गत बिहीबारदेखि आजको अन्तिममूल्यसम्म पुग्दा कम्पनीको शेयर मूल्य २४ दशमलब ८९ प्रतिशतले बढेको छ ।

लक्ष्मी लघुवित्त, डोल्टी पावर कम्पनी, पिपल्स हाइड्रोपावर, अप्पर हेवाखोला हाइड्रोपावर, आशा लघुवित्त, खानीखोला हाइड्रोपावरलगायतका कम्पनीको शेयर मूल्यमा झन्डै २० प्रतिशतले उतारचढाव देखिएको छ ।

भुगोल इनर्जी डेभलपमेन्ट, नेसनल हाइड्रोपावर कम्पनी, इन्फिनिटी लघुवित्त, जोशी हाइड्रोपावर, पञ्चकन्या माई हाइड्रोपावर, माउन्टेन हाइड्रो नेपाल, हिमालयन हाइड्रोपावर लिमिटेड, श्वेतगंगा हाइड्रोपावर, दिब्यश्वरी हाइड्रोपावर र सोनापुर हाइड्रोपावर १७ देखि १९ प्रतिशतसम्म मूल्यमा उतारचढाव हुने कम्पनीहरु हुन । यी कम्पनीहरु लगायत अन्य कम्पनीको शेयर मूल्य धेरै उतारचढाव हुँदा नै आजको शेयर कारोबार रकम धेरै भएको हो । सोमबार करिब ५ महिनापछि झन्डै ५ अर्ब रुपैयाँको कारोबार भएको छ । नेप्से परिसूचक १८ सयको लाइनमा कारोबार भइरहँदा कारोबार रकम १ अर्बभन्दा पनि मुनि हुने गर्दथ्यो । नेप्से उकालो लागेसँगै विस्तारै कारोबार रकम समेत बढ्दै जान थालेको हो ।

भोलाटाइल कम्पनीहरुमा अधिकांश कम्पनी हाइड्रोपावर समूहमा रहेका छन् । उच्च मूल्य भोलाटाइलयुक्त २० कम्पनीमा १४ कम्पनी हाइड्रोपावर समूहबाट, ४ वटा माइक्रोफाइनान्स समूहबाट, १ वटा लगानी समूहबाट र १ वटा उत्पादनमूलक समूहबाट परेका छन् ।